თბილისი (GBC) – I კვარტალში  ბიზნეს სექტორის ბრუნვა 19.1%-ით 15.2 მილიარდ ლარამდე გაიზარდა, - „საქსტატმა“ საწარმოთა საქმიანობის შედეგები წარადგინა.

ოფიციალური მონაცემებით,  ზრდის ტენდენციით ხასიათდება ბიზნეს სექტორის პროდუქციის გამოშვების მაჩვენებელიც, რაც 7,5 მილიარდი ლარით განისაზღვრა, 16,1%-ით მეტი წინა წლის შესაბამისი პერიოდის მაჩვენებელზე.

ბიზნესს იანვარ-მარტში საშუალოდ,  605,0 ათასი კაცი ჰყავდა დასაქმებული, ზრდა 5%-ია. მათ შორის დაქირავებულთა მთლიანმა რაოდენობამ 570,9 ათასი კაცი შეადგინა (გასული წლის შესაბამის პერი- ოდთან შედარებით - 5,5%-ით მეტი).

დასაქმებულთა მთლიანი რაოდენობიდან 40,2% ქალია, ხოლო 59,8% - კაცი.

დასაქმებულთა მთლიანი რაოდენობის 36 % მსხვილ ბიზნესზე მოდის, 22,1% - საშუალო, ხოლო დარჩენილი 41,9% - მცირე ბიზნესზე.

აღსანიშნავია, რომ 2017 წლის პირველ კვარტალში საშუალო თვიური ხელფასი ბიზნეს სექტორში 1024,0 ლარს გაუტოლდა (გასული წლის შესაბამისი პერიოდის მაჩვენებელთან შედარებით გაზრდილია 101,6 ლარით), მათ შორის ქალების ხელფასმა შეადგინა - 776,4 ლარი (გასული წლის შესაბამისი პერიოდის მაჩვენებელთან შედარებით გაიზარდა 89,3 ლარით).