თბილისი (GBC) - ახალი კადრების მოძიების ძირითადი წყაროს საწარმოებისთვის ნათესავები, მეგობრები და ნაცნობები წარმოადგენს. ასეთია შრომის ბაზრის კვლევის შედეგები, რომლის მიხედვითაც, საწარმოთა 51%-მა განაცხადა, რომ კადრებს სწორედ ნაცნობების მეშვეობით ეძებს. მეორე ადგილს ინტერნეტი იკავებს 30%-ით, მესამეზე კი ბეჭვდური განცხადებებია 10%-ით. დასაქმების კერძო სააგენტოებზე კი 7.7% მოდის. Worknet.gov.ge-ს მეშვეობით კადრებს დამსაქმებლების მხოლოდ 0.3% ეძებს.

აპლიკანტთა შეფასება ძირითადად გასაუბრების მეშვეობით ხორციელდება (გამოკითხულთა 52.8%), ხოლო მათი შეფასების მთავარი კრიტერიუმი გამოცდილებაა (გამოკითხულთა 56.1%).

კვლევის შედეგების მიხედვით, საწარმოთა 60%-ს აპლიკანტის მიერ რომელიმე უცხო ენის ცოდნა არ ესაჭიროება. საწარმოთა 40%-ის შემთხვევაში კი უცხო ენის ცოდნა მნიშვნელოვანი ფაქტორია. ის საწარმოები, რომლებიც აპლიკანტების მიერ უცხო ენის ცოდნას ითხოვენ, აქცენტს აკეთებენ ინგლისური ენის ცოდნაზე (გამოკითხულთა 53%), რუსულ ენასა (გამოკითხულთა 40%) და თურქულ ენაზე (გამოკითხულთა 6%).

საწარმოები მხოლოდ 2%- ის შემთხვევაში ითხოვენ აპლიკანტთა მიერ რომელიმე სხვა უცხო ენის ცოდნას.