თბილისი (GBC) - 2019 წლის ოქტომბერში საქართველოში ბაზრების და ბაზრობების ორგანიზებით დაკავებული 208 ეკონომიკური სუბიექტი ფუნქციონირებდა. მათი 30,8% თბილისშია განთავსებული, 20,7% - იმერეთის, 12% - სამეგრელო-ზემო სვანეთის, 12% - კახეთის, 7,2% - ქვემო ქართლის, 5,3% - აჭარის, 4,3% - შიდა ქართლის, 2,9% - სამცხე-ჯავახეთის, 1,9% - გურიის, 1,9% - მცხეთა-მთიანეთის, 1% - რაჭა-ლეჩხუმის და ქვემო სვანეთის რეგიონებში.

ბაზრების და ბაზრობების ორგანიზებით დაკავებული ეკონომიკური სუბიექტებისათვის ყველაზე გავრცელებული ორგანიზაციულ-სამართლებრივი ფორმაა შპს და მასზე მოდის 76,4%, ინდივიდუალური მეწარმეების წილად კი - 21,1%.

ბაზრების და ბაზრობების დანარჩენ ნაწილს გააჩნია სააქციო საზოგადოების (1%), კოოპერატივის (1%) და სოლიდარული პასუხისმგებლობის საზოგადოების (0,5%) ორგანიზაციულ-სამართლებრივი ფორმა.

2019 წლის ოქტომბერში, საქართველოს ტერიტორიაზე განთავსებულ ბაზრებსა და ბაზრობებზე 45,1 ათასი კაცი ვაჭრობდა, რომელთა 44,3% თბილისზე მოდის, 14,2% - იმერეთის, რაჭა-ლეჩხუმის და ქვემო სვანეთის, 9,8% - ქვემო ქართლის, 9,1% - კახეთის, 7,5% - აჭარის, 7,5% - სამეგრელო-ზემო სვანეთის, 3,6% - შიდა ქართლის, 1,8% - სამცხე-ჯავახეთის, 1,3% - მცხეთა-მთიანეთის და 0,9% - გურიის რეგიონზე ნაწილდება.

2019 წლის ოქტომბერში საქართველოს ბაზრებსა და ბაზრობებზე მოვაჭრე ეკონომიკური სუბიექტების მიერ რეალიზებულია 302, მლნ ლარის სამომხმარებლო საქონელი (ავტომობილების გარდა), რომელთა 19,9% სურსათზე მოდის, 74,4% - არასასურსათო საქონელზე, 5,7%-ს ცხოველების და ფრინველების ჯგუფი შეადგენს. 90,6 მლნ ლარით შეფასდა ავტომობილებით მოვაჭრე ეკონომიკური სუბიექტების სავაჭრო ბრუნვის მოცულობა.

გამოკვლევის შედეგების მიხედვით, ბაზრების და ბაზრობების ტერიტორიაზე მოვაჭრე ეკონომიკური სუბიექტების ბრუნვის მოცულობის 61,5% თბილისზე მოდის, 12,3% - იმერეთის, რაჭა-ლეჩხუმის და ქვემო სვანეთის, 7% - ქვემო ქართლის, 5% - აჭარის, 5% - სამეგრელო-ზემო სვანეთის, 3,4% - კახეთის, 3,3% - სამცხე-ჯავახეთის, 2,1% - შიდა ქართლის, 0,2%- მცხეთა-მთიანეთის და 0,2% - გურიის რეგიონზე ნაწილდება.