თბილისი (GBC) -  არის მცდელობა ჩაგვითრიონ ბინძურ პოლიტიკურ თამაშში, რომელშიც დამოუკიდებელი ბიზნესის ადგილი ნამდვილად არ არის- კომპანია RMG  20 მარტის აუქციონთან დაკავშირებით განცხადებას ავრცელებს. 

"ვაცხადებთ, რომ ჩვენი კომპანია დაინტერესებული იყო აუქციონის წესით მხოლოდ გონივრულ ფასად მიეღო კონკრეტული 16 ჰა მიწის ნაკვეთი დმანისის რაიონში.

ბოლო დღეებში განვითარებული მოვლენების ფონზე არის მცდელობა ჩაგვითრიონ ბინძურ პოლიტიკურ თამაშში, რომელშიც დამოუკიდებელი ბიზნესის ადგილი ნამდვილად არ არის! კომპანიაში ვიცოდით, რომ აუქციონის პროცესიც კონკრეტული ძალის მიერ დადგმული აბსურდული თამაშის ნაწილი გახდებოდა.

შესაბამისად, ჩვენ მივიღეთ გადაწყვეტილება ამ პროცესში მიგვეღო მონაწილეობა იმ მიზნით, რომ მოწინააღმდეგის ნამდვილი სახე გვეჩვენებინა. ახლა, როდესაც შედეგი სახეზეა და მათი რეალური ინტერესები გამოჩნდა, ვეხსნებით ხელმოცარული პოლიტიკოსების მიერ ცუდად დადგმულ სპექტაკლს.

მოვუწოდებთ სახელმწიფოს, რომ უზრუნველყოს კერძო ბიზნესის დაცვა პოლიტიკური და მით უფრო მსგავსი დესტრუქციული ძალების ჩარევისგან, სამართლებრივი ფორმით", - ნათქვამია კომპანიის განცხადებაში. 

აუქციონზე გამოტანილი, დმანისში მდებარე  16 ჰა მიწის ნაკვეთის წლიური საიჯარო ქირის საწყისი ფასი 15 000 ლარი იყო, საბოლოო ფასი კი,   5.056 მილიონ ლარამდე გაიზარდა. პოლიტიკური პარტიების მიერ დაფუძნებულ ფონდს თანხის შესაგროვებლად  ახლა 45 დღე აქვს.