თბილისი (GBC) – ქართული ღვინო ტოკიოში FOODEX JAPAN 2018-ზე 10 კომპანიით წარსდგა.

“მეღვინეობა ვაზიანი”, “მარანული”, “დუგლაძეების ღვინის კომპანია”, “შატო ნეკრესი”, შპს “ქინძმარაული”, “სარაჯიშვილი”, შპს “ალავერდი”, “ქიმერიონი”, “მოსმიერი” და “ჩელთი”.

ღვინის ეროვნული სააგენტოს  წარმომადგენელი ირაკლი ჩოლობარგია იაპონელი ექსპერტების დიდ დაინტერესებაზე აცხადებს, განსაკუთრებით ქვევრის ღვინით, -„იაპონელი მომხმარებელი და ღვინის პროფესიონალები ბოლო რამდენიმე წელია დიდ ყურადღებას იჩენენ ქართული ღვინის მიმართ, რაც აისახა კიდეც მზარდ ექსპორტში. სააგენტოს  აქტივობები მოიცავს როგორც დეგუსტაციებსა და გამოფენებში მონაწილეობას, ასევე იაპონელი ექსპერტების ვიზიტების დაგეგმვას საქართველოში, რათა მათ მიეცეთ შესაძლებლობა ადგილზე გაეცნონ ქართულ ღვინოს და მის კულტურას." 

გამოფენა 9 მარტამდეა. უკვე გაიმართა პრეზენტაცია „საქართველო - ღვინის აკვანი“  და  სემინარი, ჟურნალისტების, იმპორტიორების, ექსპერტების, რესტორნების და სავაჭრო ქსელების წარმომადგენლების მონაწილეობით, მათ შორის იყო  იაპონიის სომელიეთა ასოციაციის პრეზიდენტი სატორუ მორი.

„FOODEX JAPAN” 1976 წლიდან ტარდება და  აზიაში  ყველაზე მასშტაბურ გამოფენად  მიიჩნევა.