თბილისი (GBC) -  SPAR საქართველოს  რეგიონული ფრენჩაიზინგის განვითარების პროექტის ფარგლებშილოკალური სუპერმარკეტების ქსელი DAILY GROCERY შეუერთდა. 

კომპანიის მენეჯმენტის ცნობით, „დეილი“-ს სუპერმარკეტებში ცვლილებები უახლოეს მომავალში დაიწყება. ამჟამად „დეილი გროსერი“ ბაზარზე  წარმოდგენილია 24 მაღაზიით, რომლებიც საქართველოს სხვადასხვა კუთხეში მდებარეობს.

"მიმდინარე წლის განმავლობაში „დეილი“-ს სუპერმარკეტები ეტაპობრივად მოერგება "სპარ"-ის საერთაშორისო სტანდარტებს- არსებულ მაღაზიებში გაფართოვდება პროდუქციის ასორტიმენტი, დაემატება მზა კერძების წარმოება, განხორციელდება მაღაზიების სრული რებრენდინგი, ამასთან ერთად "სპარ"-თან ერთობლივი პროექტის ფარგლებში გაიხსნება 25-მდე ახალი მაღაზია. აღსანიშნავია რომ „დეილი“-ს ყველა თანამშრომელი "სპარ"-ის გადამზადების ცენტრში გაივლის სპეციალურ გადამზადებას, რაც კიდევ უფრო ხელს შეუწყობს საცალო გაყიდვებში კვალიფიცირებული კადრების ფორმირებას", - აცხადებენ  SPAR -ში. 

„დეილი“-ს შემოერთებით "სპარ"-ის ქსელი საქართველოში უკვე ითვლის 96 მაღაზიას და წლის ბოლომდე საქართველოში "სპარ"-ის ქსელი 160 მაღაზიამდე გაიზრდება.