თბილისი (GBC) - ბრიტანული არასამთავრობო ორგანიზაცია OXFAM-ის მონაცემებით, საქართველოში ოჯახების 60%-ზე მეტი პროდუქტებს ვალით ყიდულობს, რადგან მათი შემოსავალი თვეში 700 ლარს არ აღემატება.

ორგანიზაცია აღნიშნავს, რომ  ეს თანხა საკმარისი არაა იმისთვის, რომ ვალების გარეშე ადამიანმა ცხოვრება შეძლოს.

მათი მონაცემებით,  საქართველოში ოჯახების მხოლოდ 18% იღებს შემოსავალს 700-დან 1200 ლარამდე თვეში, რაც ითვლება საშუალო კლასად.  მაღალშემოსავლიანი კლასი, რაც გულისხმობს იმ ოჯახებს, რომელთა შემოსავალი 1200 ლარზე მეტია, შეადგენს დაახლოებით, საქართველოს მოსახლეობის 4%-ს.

თამარ მანჯავაძის თქმით, რომელიც კვლევის ერთ-ერთი ავტორია, საქართველოს მოსახლეობის 65% მიეკუთვნება იმ კატეგორიას, რომელიც ხარჯავს მისი შემოსავლის 65% -ს კვებაში.

"ისინი პრაქტიკულად ვერ აძლევენ თავიანთ თავს იმის უფლებას, რომ თანხა გადაანაწილონ სხვა ხარჯებისთვის. ასევე მათი დიდი ნაწილი გარკვეული პერიოდიდან გარკვეულ პერიოდამდე პროდუქტს ვალით ყიდულობს”, - აღნიშნავს ის.