თბილისი (GBC) - ორშაბათის ვაჭრობა Wall-Street -ზე ამერიკული ინდექსების ჩამოშლით დასრულდა.

Dow Jones -ის ინდექსმა 1 დღეში 1200 პუნქტი დაკარგა, ანუ 4.6%-იანი ვარდნა აჩვენა, რაც რეკორდულია მისი ისტორიის მანძილზე, ასევე რეკორდულია პროცენტულ გამოსახულებაში 2011 წლის აგვისტოდან, როცა ევროზონაში სავალო კრიზისი მძვინვარებდა.

მინუსშია S&P 500 -იც. 4%-იანი ვარდნით დასრულებული ორშაბათი,  მისთვის ბოლო 6 წლის განმავლობაში ყველაზე ცუდი დღე აღმოჩნდა.

Bloomberg -ის ცნობით, ინდექსების ვარდნა დაემთხვა კომპანია Sheffer Corp  -ის ქარხანაში აშშ-ს პრეზიდენტის გამოსვლას, სადაც ის ამერიკული ეკონომიკის წარმატებაზე, მათ შორის საგადასახადო რეფორმაზე საუბრობდა.  საფონდო ინდექსების ვარდნა კი, ტრამპს გამოსვლისას არ უხსენებია. 

Assoсiated Press -ი   აღნიშნავს, რომ აშშ-ში ვარდნა გასულ პარასკევს დაიწყო. ინვესტორებს ინფლაციის ტემპი  და საპროცენტო განაკვეთები აშფოთებთ.

Bloomberg -ის ცნობით, საფონდო ინდექსების ჩამოშლამ 500 უმდიდრესი ადამიანის ქონება 1 დღეში 114 მილიარდით შეამცირა. ყველაზე მეტად უორენ ბაფეტი დაზარალდა. მისი ქონება ერთბაშად 5.1 მილიარდით შემცირდა.