თბილისი (GBC) - ეკონომიკიდან შინაგან საქმეთა სამინისტროში გადანაცვლებული გიორგი გახარია საპენსიო რეფორმის გატარების აუცილებლობაზე აცხადებს. 

ვიცე-პრემიერი ამბობს, რომ რეფორმა არის ერთმნიშვნელოვნად აუცილებელი, გრძელვადიანი და მდგრადი ეკონომიკური განვითარებისთვის და მიიჩნევს, რომ რეფორმის რეგულირების გავლენის შეფასებაც უნდა არსებობდეს. 

"რეგულირების გავლენის შეფასება, როგორც ასეთი, უნდა არსებობდეს და დარწმუნებული ვარ, რომ ის იქნება. კვლევა შეიძლება ჩატარდეს ეკონომიკის სამინისტროს დონეზე, ასევე უწყებათაშორისი ჯგუფების დონეზე, მაგრამ ასეთი კვლევები ყოველთვის ტარდებოდა. ვფიქრობ, გარკვეული კონსოლიდირებული კვლევა იქნება ჩასატარებელი და დარწმუნებული ვარ, რომ ჩვენი კოლეგები ამას გააკეთებენ“, - განაცხადა გახარიამ მთავრობის სხდომის დასრულების შემდეგ მედიასთან. 

ამ კვირაში სააგენტო BM.ge-მ დაწერა, ISET-მა საპენსიო რეფორმის რეგულირების გავლენის შეფასება (RIA) ჩაატარა, თუმცა ის არ  გასაჯაროვებულა და  ეკონომიკის სამინისტროს შიდა მოხმარებისთვის გაკეთდა.