თბილისი (GBC) - იურისტი დავით ებრალიძე სემეკის მიერ ტარიფების ზრდის გადაწყვეტილებით კანონთან წინააღმდეგობაზე მიუთითებს. 

ყოფილი ენერგო ომბუდსმენი საკითხს Facebook-ში გამოეხმაურა. 

"სემეკის თავმჯდომარემ განმარტა, რომ ტარიფის მატება განპირობებულია მომავალში დარგში განსახორციელებელი ინვესტიციებით. ესე იგი, უკვე გაწეული ხარჯის ასახვა კი არ მოხდა ტარიფში, არამედ, მომავალში განსახორციელებელის წინასწარ ასახვას აქვს ადგილი. მაგრამ, კანონი ამის უფლებას არ იძლევა. ტარიფი დგინდება "ელექტროენერგეტიკისა და ბუნებრივი გაზის შესახებ" საქართველოს კანონის მე-2 და 43-ე მუხლების შესაბამისად. ამ მუხლებში კი წერია, რომ კანონში მხოლოდ გაწეული ხარჯი შეიძლება აისახოს და არა მომავალში გასაწევი. შესაბამისად, გამოდის, რომ ახალი ტარიფები კანონშესაბამისი არ არის, ეს რაც შორიდან, ერთი შეხედვით ჩანს", - წერს ებრალიძე.