თბილისი (GBC) - საქართველო-რუსეთის სავაჭრო დერეფნების მონიტორინგის საკითხზე შვეიცარულ  SGS-თან კონტრაქტი გაფორმდა.

საგარეო საქმეთა სამინისტროს ცნობით, ხელშეკრულება 19 დეკემბერს, აქართველოს მხარესა და შვეიცარულ კომპანია SGS (Société Générale de Surveillance SA)-ს შორის მოლაპარაკების დასკვნითი რაუნდის შემდეგ გაფორმდა, თუმცა 2011 წელს, რუსეთ-საქართველოს შორის მიღწეული შეთანხმების   პრაქტიკული რეალიზაციისათვის, საჭიროა, რომ ასევე რუსეთის მხარემ ხელი მოაწეროს ანალოგიურ კონტრაქტს შვეიცარულ კომპანიასთან და შესაბამისად, მხარეებმა დაიწყონ კონტრაქტით ნაკისრი ვალდებულებების შესრულება.

როგორც ცნობილია, შეთანხმების ამოქმედების შემდეგ, შვეიცარიული კომპანია გააკონტროლებს ტვირთბრუნვას საქართველო-რუსეთის საზღვარზე, მათ შორის საზღვრის იმ მონაკვეთებზე, რომლებსაც საქართველოს მთავრობა ვერ აკონტროლებს (მდინარე ფსოუს და როკის გვირაბის გავლით შემოტანილ ან გატანილ ტვირთებზე).