თბილისი (GBC) – საბანკო და საინვესტიციო ბიზნესებად გაყოფის შემდეგ BGEO სახელს შეიცვლის.

რებრენდინგი BGEO GROUP-ის გენერალურმა დირექტორმა TV პირველზე დააანონსა და აღნიშნა, რომ სავარაუდო ვარიანტები უკვე აქვთ.  

ირაკლი გილაური ამბობს, რომ გაყოფის შემდეგ ლონდონის საფონდო ბირჟაზე 3 ერთმანეთისგან დამოუკიდებელი კომპანია იქნება დალისტული: საქართველოს ჯანდაცვის ჯგუფი, ბიჯეო ინვესთმენტი, რომელიც ახალ სახელს მიიღებს და საქართველოს ბანკი. ამ კომპანიებს სხვადასხვა მენეჯმენტი და სამეთვალყურეო საბჭო ეყოლებათ.

„ჩვენი მიზანი ამ გაყოფისა იყო გამსხვილება, ვფიქრობთ, გაყოფისას ბიზნესები უფრო გაიზრდება, რასაც იზიარებენ აქციონერები. მათაც მოსწონთ ეს სტრუქტურა, რომ მენეჯმენტის ფოკუსი არ იქნება გაფანტული. როგორც წესი, ჰოლდინგების გაყოფას უფრო მეტი ღირებულება მოაქვთ სამომავლოდ აქციონერებისთვის, 95% შემთხევაში ასე იყო.  ჩვენ გვჯერა საქართველოს მომავლის და გვსურს მეტი ინვესტიცია ჩავდოთ. ბანკთან ერთად მეტი ინვესტიციის გაკეთების საშუალება არ იყო, - განაცხადა ირაკლი გილაურმა.

შეგახსენებთ, BGEO-ს გაყოფის პროცესი 2018 წლის პირველ ნახევარში უნდა დასრულდეს.