თბილისი (GBC) - „ეიპიემ ტერმინალს ფოთი“ ტვირთბრუნვის გაზრდაზე აცხადებს. 

საქართველოს უმსხვილესი პორტის მფლობელი კომპანიის ცნობით, 10 თვის   მონაცემებით ფოთის საზღვაო ნავსადგურში გადამუშავდა 5 მილიონ 502 ათასი ტონა ტვირთი, რაც 9,4%-ით მეტია წინა წლის იგივე მონაცემებთან (5,027K MT) შედარებით.

კონტეინერის ტვირთბრუნვა გაიზარდა 12,1%-ით, 2017 წელს 260 000, წინა წელს კი - 232 000 TEU კონტეინერი გადამუშავდა.

ტვირთნაკადი ქვეყნების მიხედვით ასე გამოიყურება: საქართველო 41%, აზერბაიჯანი 25%, სომხეთი - 17%, აზია -17%. 

შეგახსენებთ, 2011 წლის აპრილში, „ეიპიემ ტერმინალსმა“ შეისყიდა საქართველოში ყველაზე დიდი ნავსადგური - „ფოთის საზღვაო ნავსადგური“ რომელსაც მრავალმიზნობრივი დანიშნულება აქვს. ნავსადგურში სულ 15 ნავმისადგომია, სადაც ხდება ყველანაირი სატვირთო მომსახურების, მათ შორის რო-რო სერვისის განხორციელება.