თბილისი (GBC) -  კახა კალაძე თბილისის მერის სავარძელს ნოემბრის მეორე ნახევრიდან დაიკავებს,  მას შემდეგ, რაც ფორმალური პროცედურები დასრულდება.

ამის შესახებ  თბილისის ახლადარჩეულმა მერმა კახა კალაძემ ბრიფინგზე განაცხადა და აქტიური ტრანზიციის პერიოდიც დააანონსა. 

კალაძე ამბობს, რომ გარდამავალ პერიოდში ყოველდღიურად იმუშავებენ,  რომ  მერიაში შესვლის წამიდან დაიწყოს აქტიურ საქმიანობა და პროგრამის აღსრულება. 

თქვა, რომ იქნება გატარებული რეფორმები, მოსალოდნელია საკადრო და სტრუქტურული ცვლილებები. გუნდი კი, უახლოეს პერიოდში დასახელდება. 

„ჩემთვის ძალიან მნიშვნელოვანია კომპეტენტურობა, პროფესინალიზმი, გამოცდილების მქონე ადამიანები და სხვათაშორის ძალიან ღია იქნება ეს პროცესები მთელი ამ ოთხი წლის განმავლობაში. საკადრო ცვლილებები იქნება, იქნება რეფორმები, სტრუქტურული ცვლილებები. სხვათაშორის ძალიან ბევრი კომპეტენტური ადამიანი მუშაობს მერიაში და მაქსიმალურად შევეცდებით ყველას პროფესიონალიზმი იქნას გამოყენებული," - განაცხადა კახა კალაძემ.

მან საზოგადოებას და მხარდამჭერებს ნდობისთვის მადლობა კიდევ ერთხელ გადაუხადა.