თბილისი (GBC) - მთავრობა მომავალ წელს საქარველოში 4.5%-იან ზრდას და 3.5% -იან ინფლაციას ელის, - სწორედ ამ მაჩვენებლებზე დაიგეგმა 2018 წლის სახელმწიფო ბიუჯეტი, რომელიც პირველადი ვერსია პარლამენტშია წარდგენილი. 

მაკროეკონომიკური მაჩვენებლებიდან გამომდინარე 2018 წლის ნომინალური მშპ-ს მოცულობა 40.4 მლრდ ლარს შეადგენს, ხოლო 2021 წლისთვის პროგნოზირებულია მისი გაზრდა 51,9 მლრდ ლარამდე.

რაც შეეხება ბიუჯეტის მაჩვენებლებს: საქართველოს 2018 წლის სახელმწიფო ბიუჯეტის შემოსულობების საპროგნოზო მაჩვენებელი 12.298 მლრდ  ლარით განისაზღვრა, მათ შორის: შემოსავლები - 10 120.0 მლნ ლარია, გრანტები - 265 მლნ, ხოლო სხვა შემოსავლები 385 ლარი. 

ვალდებულებების ზრდის სახით მისაღები სახსრების გეგმა განსაზღვრულია 2.038 მლრდ ლარის ოდენობით, მათ შორის:  საინვესტიციო პროექტების დასაფინანსებლად მიღებული გრძელვადიანი, შეღავათიანი კრედიტები - 1.288 მლრდ ლარი,  მსოფლიო ბანკისგან მისაღები საბიუჯეტო კრედიტი - 350  მლნ ლარი;  სახაზინო ვალდებულებებისა და სახაზინო ობლიგაციების ემისიით და მათი დაფარვის შედეგად საშინაო სახელმწიფო ვალდებულებების წმინდა ზრდა - 400  მლნ ლარი. 

სახელმწიფო ბიუჯეტის ასიგნებები განისაზღვრა 12.365 მლრდ  ლარის ოდენობით, მათ შორის: საბიუჯეტო სახსრები შეადგენს 10.911 მლრდ ლარს, გრანტები - 165 მლნ ლარს, ხოლო კრედიტები - 1.288 მლრდ ლარს.