თბილისი (GBC) – კომპანია ჩემი რანჩო, რომელიც ბოცვერის ხორცს აწარმოებს გაფართოებისთვის ემზადება.

კომპანიის დამფუძნებელი ვანო იოსელიანი GBC-სთან ამბობს, რომ  ფერმის გაფართოებასზამთარში დაიწყებენ, რაშიც დაახლოებით 1 მილიონი ლარის ინვესტიცია ჩაიდება. შედეგად, ფერმაში სულადობა 10 000-დან 25 ათასამდე გაიზრდება.

კომპანია ბოცვერის ხორცს ქსელურ მარკეტებს უკვე აწვდის, მათ შორის „კარფურს“, „გუდვილს“ და „აგროჰაბს“.

„ვცდილობთ მოთხოვნის ზრდას ჩვენც შევუწყოთ ხელი.  ცოტა ხნის წინ ფასები 25%-ით შევამცირეთ, რითაც ბოცვერის ხორცი მომხმარებლისთვის უფრო ხელმისაწვდომი გახდა“, - აღნიშნავს ბიზნესმენი.

მისი თქმით, ბაზარზე ბოცვერის ხორცის ფასი 18-20 ლარიდან,  13-15 ლარის დიაპაზონამდეა შემცირებული.

„ბოცვერის ხორცი ყველაზე უნიკალური და უსაფრთხოა, შეიცავს ორგანიზმისთვის საჭირო ამინომჟავებს, D ვიტამინს, არის დიეტური და რეკომენდირებულია ბავშვებისთვისაც“, - ამბობს ვანო იოსელიანი.    

შეგახსენებთ, ბოცვერების ფერმა გარდაბნის რაიონის სოფელ გამარჯვებაში მდებარეობს.