თბილისი (GBC) - საქართველოს რკინიგზის გენერალური დირექტორის პროგნოზით   ბაქო-თბილისი-ყარსის რკინიგზაზე პირველ სატვირთო მატარებელი დაახლოებით 2 თვეში გაივლის.

მამუკა ბახტაძემ დღეს ეკონიმიკის მინისტრთან,  ტრანსპორტის, საზღვაო საქმეთა და კომუნიკაციების მინისტრ აჰმედ არსლანთან და აზერბაიჯანის რკინიგზის ხელმძღვანელ ჯავიდ ყურბანოვთან ერთად, ბაქო-თბილისი-ყარსის სარკინიგზო ხაზის ინსპექტირების მიზნით, თბილისიდან კარწახამდე მატარებლით იმგზავრა.

,,ვფიქრობთ, რომ დაახლოებით, 2 თვეში მზად ვიქნებით, რომ გავატაროთ პირველი სატვირთო მატარებელი. რაც შეეხება სამგზავრო გადაყვანებს, ამას სჭირდება კიდევ დამატებითი ინფრასტრუქტურის მოწყობა და ახალი მოძრავი შემადგენლობის შესყიდვა. ეს შედარებით საშუალოვადიანი პერსპექტივაა. რაც შეეხება სატვირთო გადაზიდვებს, ჩვენ შევთანხმდით, რომ დაახლოებით, 2 თვეში მივიღოთ პირველი სატვირთო მატარებელი", - განაცხადა მამუკა ბახტაძემ.

მისივე თქმით, არის სურვილი, რომ კომერციული საქმიანობის დაწყება მალე მოხდეს, რადგანაც ბაზარზე მოთხოვნა არსებობს, 

"ბევრ კლიენტთან გვაქვს ურთიერთობა, რომელიც მზადაა  საზღვაოდან ჩვენს ახალ მარშრუტზე გადმოერთოს და შესაბამისად, ამოცანა დგას ასე, რომ რაც შეიძლება სწრაფად დავიწყოთ სატვირთო გადაზიდვები",  - განაცხადა ბახტაძემ.

როგორც მან აღნიშნა, საქართველოს რკინიგზის სატვირთო პოლიტიკის მთავარი ამოცანა იქნება, რომ ამ მარშრუტმა მოიზიდოს დამატებითი ტვირთები დერეფნისთვის და არ წარმოშვას ჩვენი პორტებიდან ტვირთების გადმომისამართება.

,,ეს საკითხი არაერთხელ დაისვა და ჩვენ ძალიან მკაფიოდ ვუპასუხეთ, რომ სატარიფო პოლიტიკაში ჩადებული იქნება ისეთი მექანიზმები, რომლებიც პრიორიტეტს მიანიჭებს დამატებითი ტვირთების მოზიდვას, რომელიც დღეს ძირითადად დადის საზღვაო მარშრუტით და ის ცდება ჩვენს დერეფანს", - განაცხადა ბახტაძემ.