თბილისი (GBC) - გაკოტრებულ ავიაკომპანია  Air Berlin-ს ქვეყნის უმსხვილესმა გადამზიდავმა  Lufthansa-მ 200 მლნ ევრო შესთავაზა. 

გარდა ამისა,  Lufthansa მზადაა, გარდამავალ პერიოდში საოპერაციო ხარჯების დასაფარად, კომპანიაში 100 მლნ ევრო ჩადოს , - იტყობინება Reuters -ი Bild am Sonntag -ის პუბლიკაციაზე დაყრდნობით. 

ანონიმი წყაროს ცნობით, ყიდვა-გაყიდვის დოკუმენტების გაფორმებას და გარიგების დახურვას შესაძლოა 3 თვე დასჭირდეს. ამ პერიოდში კომპანიებმა ევროპელი მარეგულირებლების თანხმობაც უნდა მოიპოვონ. 

Air Berlin-მა გაკოტრების შესახებ მას შემდეგ განაცხადა, რაც მთავარმა აქციონერმა (წილი: 29.2% ) Etihad Airways -მა კომპანიას ფინანსური დახმარება შეუწყვიტა.  ბოლო 6 წელში კომპანიის ზარალი 2.7 მლრდ ევროა, წმინდა ვალი 1.2 მილიარდს აღწევს.  

Air Berlin-ი გერმანიაში სიდიდით მეორე ავიაკომპანიაა, რომელიც დაბალბიუჯეტიან სეგმენტზე მუშაობს, თუმცა მძაფრ კონკურენციას ვერ გაუძლო, პირველ რიგში Ryanair-თან, რომელიც აგრესიულად ანვითარებს თავის ბიზნესს გერმანიის ბაზარზე.