თბილისი (GBC) - “კამარა ჰესის” საპროექტო სიმძლავრე გაიზარდა, - ამის შესახებ კომპანია „როიალ ბილდინგ ჯორჯიას“ მიერ მომზადებულ გზშ-ს ანგარიშშია ნათქვამი.

დოკუმენტის მიხედვით, კომპანია თერგზე, ყაზბეგის მუნიციპალიტეტის ტერიტორიაზე, არა 11,74 მგვტ დადგმული სიმძლავრის, არამედ, 13,2 მგვტ-ის სიმძლავრის ჰესს ააშენებს, რაც საშუალო სიმძლავრის ჰესების კატეგორიას განეკუთვნება.

ჩატარებული საძიებო სამუშაოების შედეგად მიღებული ინფორმაციისა და ჰესის კვანძების განთავსების ტერიტორიის ადგილზე დეტალურად, რამდენჯერმე დათვალიერება-შესწავლის შემდეგ, ჰესის კვანძების განთავსების ადგილებმა, ნიშნულებმა და საპროექტო ჰესის სიმძლავრის მახასიათებლებმაც განიცადა გარკვეული კორექტირება“, - აღნიშნულია დოკუმენტში.

აღსანიშნავია, რომ ჰესს ექნება 3 ტურბინა და არა ადრე განსაზღვრული 2.

ჰესი ეწყობა და მუშაობს მდინარის მოდინებაზე, მდინარის ჩამონადენის დარეგულირების გარეშე. ჰესის სათავე წყალმიმღები კვანძი ეწყობა ყაზბეგის მუნიციპალიტეტის სოფ. ტყარშეტთან.

გზშ-ს ანგარიშის განხილვა  20 ოქტომბერს, 12:00 საათი, ყაზბეგის მუნიციპალიტეტის გამგეობის შენობაში მოხდება.