თბილისი (GBC) - მუნიციპალური განვითარების ფონდი ბაკურიანში ყინულის მრავალფუნქციური მოედნის წინასწარი ტექნიკურ-ეკონომიკური დასაბუთებისა და კონცეპტუალური პროექტის მოსამზადებლად ინტერესთა გამოხატვას აცხადებს.

საკონსულტაციო მომსახურება ითვალისწინებს საინჟინრო-საპროექტო მომსახურების გაწევას.

პროექტით გათვალისწინებული უნდა იყოს  2300 სკამზე გათვლილი ჰოკეის არენის მოწყობა, საციგურაო მოედნით, რომელსაც ექნება შესაძლებლობა  სპორტისა თუ კულტურული ღონისძიებების მიხედვით ტრანსფორმირდეს.

ასევე აღჭურვილი უნდა იყოს 8 ინდივიდუალური და 2 ჯგუფური გასახდელით, 80 კაცზე გათვლილი რესტორნით, 300 მანქანის ტევადობის პარკინგით, შოპინგ ცენტრითა და სხვა შესაძლებლობებით.

ტერიტორია სადაც მრავალფუნქციური მოედანი უნდა განვითარდეს 10,000 კვ.მ-ია, ხოლო ჯამური ტერიტორია 16,800 კვ.მ-ია.

ინტერესთა გამოხატვაში მონაწილეობა კომპანიებს მიმდინარე წლის 11 სექტემბრამდე შეუძლიათ მიიღონ.