თბილისი (GBC) - 1  სექტემბრიდან მიმოქცევაში ახალი მოდიფიკაციის 5 ლარის ნომინალის ბანკნოტები  ჩაეშვება.

სებ-ის პრეზიდენტის ბრძანებით, ახალი ბანკნოტები მიმოქცევაში  წინა წლების გამოშვების იგივე ნომინალის კუპიურების პარალელურად იქნება და  ანგარიშსწორება შეუფერხებლად განხორციელდება.

აღსანიშნავია, რომ ახალი 5 ლარიანი პირველი ბანკნოტია კობა გვენეტაძის ხელმოწერით. 

განახლებული 5 ლარის ნომინალის ბანკნოტის დიზაინის ავტორი ბაჩა მალაზონიაა. წინა მხარეს გამოსახულია ივანე ჯავახიშვილის სახელობის თბილისის სახელმწიფო უნივერსიტეტი, ივანე ჯავახიშვილის განსხვავებული პორტრეტი გაუმჯობესებული რელიეფურობის ხარისხითა და მოცულობით.

ბანკნოტის უკანა მხარეს/რევერსზე გამოსახულია ნიკო ფიროსმანის ტილოები - "მეთევზე წითელ პერანგში" და "კალო". ასევე, საქართველოს სახელმწიფო გერბი. 

შეგახსენებთ,  განახლებული 20 და 50 ლარიანი ბანკნოტები მიმოქცევაში 2016 წლის  1 თებერვლიდან ჩაეშვა. რაც შეეხება 100 ლარის ნომინალის განახლებულ ბანკნოტებს, ის იმავე წელს მოგვიანებით ჩაეშვა მიმოქცევაში. 

განახლებული ბანკნოტების შესახებ დაწვრილებითი ინფორმაციის მისაღებად შეგიძლიათ ეწვიოთ სპეციალურ ვებგვერდს - www.ganakhlebulilari.ge