თბილისი (GBC) -  თიბისი ბანკმა წლის პირველი ნახევრის წარმატებით დასრულებაზე განაცხადა.

ბანკის გენერალურმა დირექტორმა ვახტანგ ბუცხრიკიძემ ინვესტორებს ფინანსური ანგარიში წარუდგინა და აცნობა, რომ 6 თვეში წმინდა მოგება 184.4 მლნ ლარია, გადასახადების გადახდამდე მოგებამ 191.4 მლნ ლარი შეადგინა, წლიური ზრდა 53.7 მლნ ლარია.

FTSE 250 -ის წევრი ქართული ბანკი აცხადებს, რომ წელს მიზანია კაპიტალზე უკუგება 20%-ზე მეტი იყოს და  საკრედიტო პორტფელი  15%-ით გაიზარდოს.

„ჩვენ ვინარჩუნებთ აქტივების კარგ ხარისხს, ასევე კაპიტალის ადეკვატურობის და ლიკვიდურობის მაღალ დონეს. ხელსაყრელი მაკროეკონომიკური პირობები და ბაზარზე ჩვენი ლიდერი პოზიციები ქმნის ძლიერ საფუძველს მომავალში ჩვენი ზრდის პერსპექტივისთვის“ , - ამბობს ბანკირი.

ანგარიშში აღნიშნულია, რომ 30 ივნისის მდგომარეობით თიბისი ბანკის აქტივები 11.280 მლრდ ლარია, 66.6%-ით მეტი ვიდრე შარშან. კვარტალურ ჭრილში ჯამური აქტივები 918.2 მლნ ლარით, ანუ 8.9%-ით გაიზარდა.

 აღსანიშნავია, რომ წლის პირველი ნახევრის დასასრულს თიბისის საკრედიტო პორტფელი 7.386 მლრდ ლარს შეადგენდა, წლიურად ზრდა 56.8%-ია (ბანკ რესპუბლიკას შერწყმის ეფექტის გამორიცხვით ზრდა 30.8%-ია), კრედიტების დოლარიზაციის მაჩვენებელი 60.8% შეადგენს, წლიური კლება 5.4 პროცენტული პუნქტია.