თბილისი (GBC) - საქართველო  ბიზნესპროცესების აუთსორსინგისთვის მიმზიდველი ლოკაცია ხდება.

ეკონომიკის სამინისტროს ცნობით, კომპანია „Base4“-მა ამ მიმართულებით მნიშვნელოვანი ინვესტიცია განახორციელა და საქართველოდან არქიტექტურული და საინჟინრო სერვისების აუთსორსინგს იწყებს.

კომპანია, სადაც 50 ადამიანი დასაქმდება, საქართველოში ქართველი არქიტექტორების დახმარებით შექმნის არქიტექტურულ და საინჟინრო პროექტებს ისეთი მაღალი კლასის სასტუმროების ქსელებისთვის, როგორებიცაა: Hilton Hotels & Resorts, Hyatt Hotels Corporation, Marriott Hotel და ა.შ. 

ბოლო 1 წლის განმავლობაში უკვე რამდენიმე საერთაშორისო, ცნობილმა კომპანიამ სერვისების აუთსორსინგის კუთხით საქართველოში მნიშვნელოვანი ინვესტიცია განახორციელა.  

მსხვილი ინვესტორებიდან ერთ-ერთია გერმანული კომპანია Arvato Bertelsmann-ი. ამ ეტაპზე კომპანიამ 150 ადამიანი დაასაქმა, რომლებიც ევროპის ქვეყნებს სხვადასხვა სახის მომსახურებებს აწვდიან,  მათ შორის კლიენტებთან ურთიერთობის მართვის, ელექტრონული ვაჭრობისა და ფინანსების მიმართულებით.

უახლოეს მომავალში კომპანია დამატებით 150 ახალი თანამშრომლის აყვანას გეგმავს. 

აღნიშნული მიმართულება ფინანსური სერვისების, საინფორმაციო სატელეფონო ცენტრების,  მონაცემთა ცენტრების, კლიენტებთან ურთიერთობის მართვის, IT მომსახურების, ადამიანური რესურსების მართვის, R&D და მრავალი სხვა მომსახურების საქართველოდან მართვასა და მიწოდებას გულისხმობს.