თბილისი (GBC) - Google-ის აპლიკაციებს დამატებით 30 ენის ხმოვანი ამოცნობის ფუნქცია დაემატა. მათ შორისაა ქართულიც.

კომპანიის პრეს-რელიზში ყურადღება ქართულ ენაზეა გამახვილებული: "განახლების შედეგად გვემატება უძველესი ქართული ენა, მისი მეათე საუკუნის დროინდელი ანბანით".

ახალი ენების დამატებისა და საუბრის ნიმუშების ასაღებად, Google მშობლიურ ენაზე მოსაუბრეებს პოპულარული ფრაზების წაკითხვას სთხოვდა. ახალი ენები, ხელმისაწვდომი გახდა Cloud Speech API-ში და მალე დაემატება კომპანიის  სხვა აპლიკაციებსაც, მათ შორის Google Translate-ს.

შესაბამისი ფუნქციის გასააქტიურებლად Play Store-დან უნდა გადმოტვირთოთ და  დააყენოთ Gboard და აირჩიეთ ქართული ენა. ამის შემდეგ დააჭირეთ მიკროფონს და დაიწყეთ საუბარი.

ხმით ძებნის ფუნქციის გასააქტიურებლად, გახსენით Google-ის აპლიკაცია, მარცხენა ზედა კუთხეში დააჭირეთ მენიუს და გადადით პარამეტრების განყოფილებაში, შემდეგ აირჩიეთ Voice (ხმა) და აირჩიეთ ქართული ენა.