თბილისი (GBC)- ჩვენი მთავარი ამოცანა საქართველოში სამუშაო ადგილების შექმნაა. შესაბამისად, ჩვენთვის მნიშვნელოვანია, მოხდეს გარკვეული ინდუსტრიული სიმძლავრეების გადმოტანა ჩინეთიდან, - განაცხადა პირველმა ვიცე-პრემიერმა, ფინანსთა მინისტრმა დიმიტრი ქუმსიშვილმა, რომელმაც საქართველოსა და ჩინეთის ძიანგსის პროვინციას შორის სავაჭრო ეკონომიკური თანამშრომლობის განვითარების სემინარის მუშაობაში მონაწილეობა მიიღო და მოხსენება გააკეთა.

ჟურნალისტებთან საუბრისას, პირველმა ვიცე-პრემიერმა განსაკუთრებული ყურადღება გაამახვილა ჩინეთიდან საქართველოში საწარმოო სიმძლავრეების გადმოტანის საკითხზე.

დიმიტრი ქუმსიშვილი ამბობს, რომ ამ გზით მათ შეეძლებათ მიერ წარმოებული პროდუქციის საქართველოდან რეალიზაცია მსოფლიოს იმ მიმართულებებით, სადაც საქართველოს თავისუფალი ვაჭრობის შეთანხმებები გააჩნია.

 „მიმდინარე წელს საქართველოსა და ჩინეთს შორის მაისში თავისუფალი ვაჭრობის შეთანხმება გაფორმდა. შესაბამისად, ახლა ხელი უნდა შევუწყოთ იმ ურთიერთობების განვითარებას, რომელიც აღნიშნული შეთანხმების რეალურად კაპიტალიზაციას მოახდენს და ჩვენი ქვეყნის კეთილდღეობის გაზრდას მოხმარდება“, - ამბობს მინისტრი.

პირველი ვიცე-პრემიერის განცხადებით, ასევე მნიშვნელოვანი იქნება იმ გამოცდილების გაზიარება ინფრასტრუქტურული პროექტების მიმართულებით, რომელიც ჩინეთის ძიანგსის პროვინციას გააჩნია.

„ეს არის საკმაოდ განვითარებული პროვინცია, რომელსაც რამდენიმე ათასი კილომეტრი აქვს მაგისტრალები, რამდენიმე ათასი კილომენტრი აქვს სწრაფი რკინიგზა და შესაბამისად, ამ გამოცდილების გადმოტანა, ისევე როგორც ბუნებრივი რესურსების სწორი გამოყენება, იქნება ძალიან კარგი მიმართულება", - განაცხადა დიმიტრი ქუმსიშვილმა.