თბილისი (GBC) - NAPR მომხმარებლებს მობილური ტელეფონით ან პლანშეტური კომპიუტერით უძრავი ქონების რეესტრის სერვისებით სარგებლობის საშუალება ეძლევა.

აპლიკაციის გადმოტვირთვა  App Store–დან და Play Market–დან არის შესაძლებელი. 

საჯარო რეესტრის სააგენტოს ცნობითმ მობილური აპლიკაციით მომხმარებელს შეუძლია მოძებნოს უძრავი ქონების ამონაწერი,  გაეცნოს მესაკუთრის ვინაობას, რეგისტრირებულ ფართობს და  ამონაწერში ასახულ სხვა მონაცემებს, თვალი ადევნოს სარეგისტრაციო წარმოების სტატუსს და დაათვალიეროს კონკრეტულ უძრავ ქონებაზე განხორციელებული  ყველა  ტრანზაქცია. 

მობილური აპლიკაციით სასურველი უძრავი ქონების მოძებნა განცხადების ნომრით, პიროვნების/ორგანიზაციის საიდენტიფიკაციო მონაცემებით,  მისამართითა და საკადასტრო კოდით არის შესაძლებელი. 

ამასთანავე, GPS სენსორის მეშვეობით, 360°-ის რადიუსზე,  სასურველი მიმართულებით მოწყობილობის მიტრიალებისას,  აპლიკაცია ტერიტორიულად ახლომდებარე რეგისტრირებული უძრავი ქონების ჩამონათვალს, საიდენტიფიკაციო მონაცემებს და ობიექტებამდე დაშორების მანძილს აჩვენებს. გასათვალისწინებელია,  რომ ძებნის ამ ფუნქციით სარგებლობისთვის GPS სისტემის გამართულად მუშაობაა საჭირო (შენობის შიგნით შესაძლოა   მოწყობილობამ GPS კოორდინატები ვერ მიიღოს). 

აპლიკაციას უახლოეს მომავალში უძრავ ქონებაზე ამონაწერის განახლების, რეგისტრირებულ მონაცემებში ხარვეზის შესწორებისა და საკადასტრო გეგმის მომზადების ფუნქციები დაემატება.

Android - https://play.google.com/store/apps/details?id=com.naprapps.NAPR

IOS - ttps://itunes.apple.com/app/id1235830927