თბილისი (GBC) -  საქართველოში უცხოური საინვესტიციო კაპიტალის მოზიდვის ერთ-ერთი უმსხვილესი წყარო BGEO Group  გაყოფის შემდეგ ლონდინის საფონდო ბირჟაზე 3 კომპანიით იქნება წარმოდგენილი. 

ჯგუფი ფუნქციონირებას ორი დამოუკიდებელი კომპანიის სახით გააგრძელებს,  ერთი Bank of Georgia Group,  ხოლო მეორე - საინვესტიციო ბიზნესი BGEO Investments იქნება.  მათთან ერთად ლონდონში უკვე დალისტულია "საქართველოს ჯანდაცვის ჯგუფი", მომავალში კი, მათ ენერგო აქტივების, GWP-ს, რუსთავისა და მცხეთის წყლები მფლობელი Georgia Global Utilities შეემატება, რომლის დამოუკიდებელ IPO-ს BGEO Group-ის გენერალური დირექტორი ირაკლი გილაური 2019 -2020 წლისთვის ვარაუდობს. 

BGEO-ს დღევანდელი გადაწყვეტილება  კომპანიის აქციონერთა საბჭომ უნდა დაამტკიცოს, რის შემდეგ გაყოფის რამდენიმეთვიანი პროცესი დაიწყება, რომელიც სავარაუდოდ,  2018 წლის პირველ ნახევარში დასრულდება.

 აღსანიშნავია, რომ BGEO Investments  მოიცავს: 57% წილს „საქართველოს ჯანდაცვის ჯგუფში“ (GHG), კომპანიას „ჯორჯია გლობალ იუთილითის“ (GGU), კომპანიას „m² უძრავი ქონება“, 72% წილს „თელიანი ველი“-ში, სადაზღვევო კომპანია „ალდაგს“ და ასევე მცირე, 9.9% წილს საქართველოს ბანკში.

აღსანიშნავია, რომ ინფორმაციის გავრცელების შემდეგ, BGEO-ს აქციები ლონდონში 4%-ზე მეტად გაძვირდა.