თბილისი (GBC) - ბორჯომ -ბაკურიანის რკინიგზას კულტურული მემკვიდრეობის უძრავი კომპლექსური ძეგლის სტატუსი მიენიჭა. 

მასთან ერთად, კულტურული ძეგლის სტატუსი მიენიჭება  სარკინიგზო ხაზის გასწვრი არსებულ სადგურებს, წაღვერი -ცემის სარკინიგზო ხიდს და  პორტერის ტიპის ორთქლმავალს. 

აღსანიშნავია, რომ  რომანოვებმა ახალი ვიწროლიანდაგიანი სარკინიგზო ხაზის - ბორჯომი-ბაკურიანის მშენებლობა, ხაშურ-ბორჯომის რკინიგზის მონაკვეთის გაყვანის შემდეგ, 1897 წელს წამოიწყეს.

მშენებლობის პროცესში კურორტ წაღვერთან საჭირო გახდა ხიდი, რომელიც მიხეილ რომანოვმა ალექსანდრ გუსტავ-ეიფელს შეუკვეთა. დიდი ფრანგი არქიტექტორის მიერ კონსტრუირებული ნაგებობა საქართველოში 1902 წელს ჩამოიტანეს და მდინარე ცემისწყალზე გადეს. მაღალმთიან რაიონებში კურსირებისთვის საგანგებოდ ინგლისიდან ჩამოიყვანეს „პორტერის“ ტიპის ორთქლმავალი -  „კუკუშკა“. მართალია, 1967 წლიდან პატარა ორთქლმავალი ელექტრომატარებელმა შეცვალა, თუმცა ჩვეულებისამებრ ხალხი მასაც "კუკუშკას" ეძახის.

ბორჯომ-ბაკურიანის რკინიგზის  სიგრძე შეადგენს 38 კმ-ს და სიგანე 900 მმ-ს. იმის გამო, რომ გზაზე არის მრავალი სირთულე და მოსახვევი, მგზავრობის ხანგრძლივობა შეადგენს 2.5 საათს.