თბილისი (GBC) – „ფინანსური განათლებით ადამიანები ინფორმირებული მომხმარებლები არიან, რომლებიც გონივრულ გადაწყვეტილებებს იღებენ, რაც რისკებს  უმცირებს მომხმარებელს და სექტორსაც, - განაცხადა ეროვნული ბანკის ვიცე -პრეზიდენტმა მურთაზ კიკორიამ ახალი პროექტის  "ფინანსური განათლება ჯარში" დაწყებისას.

ბანკირი ამბობს, რომ  „პროექტის მიზანია სამხედრო მოსამსახურეების ცოდნის ამაღლება საკვანძო ფინანსურ საკითხებში, პირადი და ოჯახის ბიუჯეტის მართვა, სესხება და დაზოგვა, რისკებისა და შესაძლებლობების შეფასება, მომხმარებლის უფლებები და პასუხისმგებლობები“.

"ფინანსური განათლება ჯარში", სებ-ის, თავდაცვის სამინისტროსა და გერმანული შემნახველი ბანკების ფონდს ერთობლივი პროექტია.

პრეზენტაცია და პირველი ტრენინგი, გიორგი ანწუხელიძის სახელობის სერჟანტთა მომზადების სასწავლო ცენტრში გაიმართა.  ცერემონიას მურთაზ კიკორიასთან ერთად , თავდაცვის მინისტრის მოადგილე ზაალ კაპანაძე, ფონდის რეგიონული დირექტორი ანია დაინცერი და საელჩოს წარმომადგენელი დანიელ ჰაასი დაესწრნენ.