თბილისი (GBC) - აღმასრულებელთა საერთაშორისო დღე საქართველოში კონფერენციით  აღნიშნეს და აღმასრულებლებიც დააჯილდოვეს. 

კონფერენციაზე აღინიშნა, რომ აღსრულების ეროვნული ბიურო ყოველწლიურად სულ უფრო მეტ საქმეს ასრულებს მორიგებით.  მორიგებითა დასრულებული საქმეების პროცენტული მაჩვენებელი, ბოლო 4 წლის განმავლობაში 80 %-ით გაიზარდა;

წარმოდგენილი იყო შვედეთის საერთაშორისო განვითარების სააგენტოს მიერ განხორციელებული კვლევის შედეგებიც -  საქართველოს მოსახლეობის თითქმის 70% მიიჩნევს, რომ აღსრულების ეროვნული ბიურო და აღმასრულებლის საქმიანობა ბოლო წლების განმავლობაში გაუმჯობესდა, უწყებისა და აღმასრულებლის მიმართ ნდობა 74%-მდე გაიზარდა. გამოკითხულთა 64% თვლის, რომ უწყების სერვისები − ხელმისაწვდომი, საქმისწარმოება კი გამჭვირვალეა.

აღმასრულებლის დღე და შთამბეჭდავი შედეგები უწყების თანამშრომლებს იუსტიციის მინისტრმა მიულოცა. თეა წულუკიანმა აღსრულების ბიუროს საქმიანობის შედეგები აღმასრულებელთა საერთაშორისო დღისადმი მიძღვნილ კონფერენციაზე შეაჯამა. იუსტიციის მინისტრმა სამომავლო გეგმებზეც ისაუბრა და აღსრულების ეროვნული ბიუროს თავმჯდომარე იოსებ ბაღათურიასთან ერთად მორიგების მაღალი მაჩვენებლისა და სამსახურებრივი მოვალეობის სანიმუშოდ შესრულებისათვის 19 აღმასრულებელს მადლობა გამოუცხადა.

აღინიშნა, რომ  შედეგების მიღწევა უწყებაში იუსტიციის მინისტრის ინიციატივით განხორციელებული რეფორმების შედეგად გახდა შესაძლებელი, კერძოდ:

2013 წლიდან აღსრულების ეროვნულმა ბიურომ მხარეთა ინტერესების დაცვის სტრატეგია აირჩია. შეიქმნა მხარეთა ინტერესების დაცვის სამსახური და იძულებითი აღსრულების პროცესში ჩაერთვნენ სოციალური მუშაკები. მათი მთავარი ფუნქცია მხარეთა ინტერესებს შორის ბალანსის ძიება, მედიაცია და მორიგებაა;

 2014 წლიდან დაინერგა ელექტრონული გადახდის სისტემა. მხარეებს ბანკში მისვლის გარეშე შეუძლიათ ტრანზაქციის განხორციელება;

2016 წელს ევროპელ კოლეგებთან ერთად შემუშავდა აღსრულების კოდექსის პროექტი.