თბილისი (GBC) - როდიდან ექნება ეკონომიკის სამინისტროს თავისი შენობა კვლავ უცნობია. 

ეკონომიკის მინისტრის მოადგილე, გიორგი ჩერქეზიშვილი მედიასთან პროექტის უახლოეს პერიოდში წარდგენას აანონსებს. 

მინისტრის მოადგილე ამბობს, რომ პროექტი დამუშავების ეტაპზეა.  მშენებლობა ვერ იწყება მარტივად. უშუალოდ მშენებლობის დაწყებამდე ბევრი ეტაპია გასავლელი და ბევრი სამუშაოა ჩასატარებელი.

უკვე 1 წელია ეკონომიკის სამინისტროს მთავარი ოფისი ჭოველიძის #10-ში მდებარეობს. გასულ წელს 7 500 კვ.მ ფართის დაქირავება სამინისტროს 675 000 დოლარი დაუჯდა. 

შენობის მფლობელ „ბიზნეს ცენტრი ბელინსკისთან“ გაფორმებული ხელშეკრულებით, საიჯარო ქირა თვეში 75 000 აშშ დოლარია. 

შეგახსენებთ, ჭანტურიას ქუჩაზე მდებარე სამინისტროს შენობა 2015 წელს აუქციონზე 9,5 მლნ აშშ დოლარად „ჰუალინგ ჯგუფმა“ შეიძინა. ინვესტორი ადგილზე სასტუმროს გახსნას გეგმავს.