თბილისი (GBC)  - „რეფორმეტრის“ ეკონომიკური განვითარების ინდექსით (G-EPI) საქართველოში ვითარება „საშუალოდ“ ფასდება.

ბარომეტრზე ინდექსი 50 ქულით „საშუალო“ ნიშნულზეა.  ISET -ის ახალი ინდექსი ქვეყნის ძირითადი მაკროეკონომიკური მონაცემების კომბინაციაა და  აჩვენებს  რამდენად არის გადახრილი არსებული მდგომარეობა სასურველისგან.

ინდექსის გაანგარიშებაში მონაწილე მაჩვენებლები და მათი სასურველი სიდიდეები შეირჩა საქართველოს სოციალურ- ეკონომიკური განვითარების სტრატეგია 2020-ის მიხედვით.  G-EPI-ს გაანგარიშებაში მონაწილეობს 5 მნიშვნელოვანი მაკროეკონომიკური ცვლადი: მშპ-ს ზრდა, ინფლაცია, ექსპორტი/მშპ-ში, ასევე მიმდინარე ანგარიშის დეფიციტი/მშპ-სთან და ბიუჯეტის დეფიციტი/მშპ-სთან.

ISET -მა პროექტ „რეფორმეტრის“ ფარგლებში კიდევ ერთი ახალი ინდექსი წარადგინა -  ეკონომიკისადმი განწყობის ინდექსი (G-ESI) გვიჩვენებს მომხმარებლისა და ბიზნესის განწყობას მათი ფინანსური/კომერციული მდგომარეობის და მოლოდინების შესახებ.

G-ESI ამ დროისათვის ბარომეტრზე 0.94 ქულით საშუალოსა და დადებითის საზღვარზეა.

ინდექსი არის ორი დამოუკიდებელი გამოკითხვის კომბინაცია, რომელსაც რეგულარულად ატარებს ISET-ის კვლევითი ინსტიტუტი: მომხმარებელთა განწყობის ინდექსი (CCI) და ბიზნესის განწყობის ინდექსი (BCI).

ISET-ის ცნობით, ინდექსები მუდმივად განახლდება. ასევე მუდმივად განახლდება „რეფორმეტრის“ ფარგლებში რეფორმების მიმდინარეობის შეფასებებიც.

აღსანიშნავია, რომ „რეფორმეტრის“  პროექტს ახორციელებს ISET-ის კვლევითი ინსტიტუტი USAID G4G-ის მხარდაჭერით.   მიზანია ეკონომიკური რეფორმების პროგრესის ანალიზი და რეფორმით დაინტერესებულ მხარეებს შორის დიალოგის ხელშეწყობა.