თბილისი (GBC) - ირანს შეუძლია მნიშვნელოვანი წვლილი შეიტანოს ევროპის გაზით მომარაგების დივერსიფიცირებაში, - განუცხადა სააგენტო Trend-ს ევროკომისიიდან წყარომ.

მან აღნიშნა, რომ ირანული გაზის ევროპაში ტრანსპორტირება შესაძლებელი იქნება თუ ირანი მიუერთდება "სამხრეთის გაზის დერეფანს".

„სამხრეთის გაზის დერეფანის გაშვება შესანიშნავი შესაძლებლობაა ირანისთვის შევიდეს ევროპის გაზის ბაზარზე“, - აღნიშნა სააგენტოსთან მოსაუბრე ანონიმმა წყარომ.

მისი თქმით, შესაძლებელია გაზის შეტანა თხევადი სახითაც (LNG) მოხდეს, თუმცა რა სახით შეიტანს ირანი გაზს ევროპაში თავად ამ ქვეყნის გადასაწყვეტია.

აღსანიშნავია, რომ OPEC-ის მონაცემებით, ირანი გაზის დადასტურებული  მარაგებით მსოფლიოში მეორე ადგილზეა, რუსეთის შემდეგ. მისი მარაგის მოცულობა 33.5 ტრილიონ კუბ. მეტრს შეადგენს

როგორც იცით, "სამხრეთის გაზის კორიდორი" ერთ-ერთი პრიორიტეტული პროექტია ევროკავშირისთვის და 10 მლრდ კუბ. მეტრი გაზის გატარებას ითვალისწინებს. ამ დერეფანში ბაქო-თბილისი-ერზრუმის გაზსადენს მიუერთდება TANAP-ი და TAP-ის გაზსადენები. მთავარ მიმწოდებლად აზერბაიჯანი განიხილება, თუმცა არ არის გამორიცხული მას თურქმენეთი და ირანიც შეუერთდეს.