თბილისი (GBC) - EBRD-მა "დარიალჰესთან" დაკავშირებით დარღვევები აღიარა. 

"მწვანე ალტერნატივის"  ინფორმაციით, ევრობანკის დირექტორთა საბჭომ დაამტკიცა  ბანკის დამოუკიდებელი გასაჩივრების მექანიზმის (PCM) მიერ მომზადებული ანგარიში, რომლის თანახმადაც, EBRD-მ დაარღვია საკუთარი გარემოსდაცვითი და სოციალური პოლიტიკით განსაზღვრული მოთხოვნები, როცა მიიღო გადაწყვეტილება დარიალი ჰესის დაფინანსების თაობაზე.

"ამ ნაბიჯით, ბანკმა გაიზიარა  მწვანე ალტერნატივასა  და  არასამთავრობო ორგანიზაცია „სტეფანწმინდას“ მიერ საჩივარში აღწერილი დარღვევები", - აცხადებს არასამთავრობო ორგანიზაცია, აღნიშნავს, რომ  PCM-ის მომზადებული დასკვნის თანახმად,  EBRD-მ  სათანადოდ არ შეაფასა  პროექტთან დაკავშირებული გეოდინამიკური რისკები დარიალ ჰესის  ბუნებრივ და სოციალურ გარემოზე ზემოქმედების შეფასების (ბსგზშ) ანგარიშში. 

დასკვნა ადასტურებს, რომ  არ იყოს შესწავლილი ასევე მდინარე თერგში  წყლის ხარჯის უახლესი მონაცემები.  შესაბამისად, ბანკის გადაწყვეტილება  ეფუძნებოდა  მოძველებულ მონაცემებს (1990 წელი და ძველი). 

დამოუკიდებელმა გასაჩივრების მექანიზმმა მოუწოდა EBRD-ს, რომ დარიალის ჰიდროელექტროსადგურის პროექტთან მიმართებაში რამდენიმე რეკომენდაციის დაკმაყოფილება, მათ შორის ბანკმა უნდა  უზრუნველყოს, როგორც პროექტის მიერ წარმოქმნილი, ასევე პროექტისგან დამოუკიდებლად არსებული რისკების/საფრთხეების გამოვლენა და მათი ინტეგრირება  ბუნებრივ და სოციალურ გარემოზე ზემოქმედების შეფასების (ბსგზშ) ანგარიშში;

ასევე აქტიურად  იმუშაოს დარიალ ჰესის ინვესტორთან, რათა ამ უკანასკნელმა  გაასაჯაროოს მდინარეში არსებული წყლის ოდენობის განახლებული მონაცემები და დაასაბუთოს რომ მდინარეში არსებული წყლის ოდენობა უზრუნველყოფს ბიომრავალფეროვნების და კონკრეტულად, ნაკადულის კალმახის შენარჩუნებას.