თბილისი (GBC) - გაძლიერებული კონტროლის მიუხედავად, სომხეთიდან სიგარეტის კონტრანბანდის ფაქტები კვლავ ხშირია. 

სამშაბათს, ფინანსთა სამინისტროს საგამოძიებო სამსახურმა, განსაკუთრებით დიდი ოდენობის უაქციზო სიგარეტის შენახვა, რეალიზაცია, გადაზიდვის ფაქტზე ორი პირი დააკავა.

"გამოძიებით დადგენილია, რომ ერთ - ერთი ბრალდებული, წყალტუბოს რაიონში საკუთარ საცხოვრებელი სახლის სხვენში, შემდგომი რეალიზაციის მიზნით ინახავდა განსაკუთრებით დიდი ოდენობით აქციზური მარკის სავალდებულო დართვას დაქვემდებრებულ უაქციზო სიგარეტს, კერძოდ 29 239 კოლოფ ,,Master’’-ს, რომლის ნაწილიც, 7 500 კოლოფი უაქციზო სიგარეტი ,,Master’’-ი გაასაღა ერთ-ერთ ბრალდებულზე", - ნათქვამია უწყების განცხადებაში, აღნიშნულია, რომ საქმეზე გამოძიება მიმდინარეობს,  რაც სასჯელის სახით ითვალისწინებს თავისუფლების აღკვეთას 6-დან 8 წლამდე ვადით.

2017 წელის დასაწყისიდან, მას შემდეგ, რაც თამბაქოს ნაწარმზე აქციზის ღირებულება მკვეთრად გაიზარდა, კონტრაბანდული სიგარეტის აღმოჩენის ათობით შემთხვევაა დაფიქსირებული.