თბილისი (GBC) - ირანული ავიაკომპანია TABAN Airlines, რომელიც საქართველოს ავიაბაზარზე 2016 წელს შემოვიდა,  თეირანი-თბილისი-თეირანის მიმართულებით ფრენის სიხშირეს გაზრდის.

TABAN Airlines 2 სიხშირის ნაცვლად კვირაში 6 სიხშირით იფრენს.   გაზრდილი ფრენები  7 მაისიდან 22 სექტემბრამდე, ყოველდღე, შაბათის გარდა, Airbus A310, Boeing B737 და 757 ტიპის საჰაერო ხომალდებით შესრულდება.

ავიაკომპანია გათვლას გაზრდილ მგზავრთნაკადზე აკეთებს. ირანელი ტურისტებისთვის საქართველოს გახსნის შემდეგ, მათი რაოდენობა მკვეთრად გაიზარდა. 

გასულ წელს ქვეყანას 13 651 ვიზიტორი სტუმრობდა, წლიური ზრდა 1008% იყო. წლის პირველ 4 თვეში კი, ქვეყანაში უკვე 50 000-ზე მეტი ვიზიტორია შემოსული. მათ შორის მხოლოდ აპრილში 10 293 პირი ჩამოვიდა საქართველოში, ზრდა 184%-ია.