თბილისი (GBC) - საერთაშორისო სავალუტო ფონდი საქართველოს ეკონომიკური ზრდის პროგნოზს, სავარაუდოდ, ზაფხულში გადახედავს, -  ამის შესახებ "ეკონომეტრთან" ინტერვიუში ორგანიზაციის მუდმივმა წარმომადგენელმა ფრანსუა პეჰშომ განაცხადა.

ფრანსუა პეშო განმარტავს, რომ შედარებით ფრთხილი პროგნოზი რეგიონულ და გლობალურ რისკებს უკავშირდება. თუმცა, წლის დასაწყისში ეკონომიკაში პოზიტიური ტენდენციებია და 4-პროცენტიანი ზრდა, მისი ვარაუდით, წელს მიღწევადია.

"გავეცანით იანვარ-მარტის ეკონომიკურ სტატისტიკას, მოვლენები კარგად ვითარდება. ვნახოთ, შენარჩუნდება თუ არა ეს ტენდენცია წლის განმავლობაში. ჩვენი პროგნოზი 2017 წლისთვის 3.5%-ია, თუმცა შემდეგ წლებში მაჩვენებელი მზარდია და ის 5.5%-ს აღწევს. წელს მთავრობამ ბიუჯეტში 4%-იანი ეკონომიკური ზრდა გაითვალისწინა - ჩვენი აზრით ეს მიღწევადი მაჩვენებელია. თუმცა, ჩვენ გავითვალისწინეთ რეგიონული და გლობალური რისკები და გადავწყვიტეთ ფრთხილი პროგნოზის გაკეთება" - განაცხადა ფრანსუა პეჰშომ.