თბილისი (GBC) –  ინფრასტრუქტურული პროექტების ტენდერებში მონაწილეებს საერთაშორისო კომპანიების აუდიტორული დასკვნების წარდგენა მოუწევთ.

ახალი მოთხოვნა  2017 წლის 1 ოქტომბრის შემდეგ გამოცხადებულ იმ ტენდერებს შეეხება, რომელთა სავარაუდო ღირებულება 1 მლნ ლარს აღემატება.

„როგორც საქართველოში რეგისტრირებული რეზიდენტი, ასევე საზღვარგარეთ რეგისტრირებული სამშენებლო სამუშაოების მწარმოებელი მიმწოდებლების მიმართ ერთ-ერთი სავალდებულო საკვალიფიკაციო მოთხოვნა  იქნება ბოლო 1 წლის საქმიანობის აუდიტის დასკვნა. აღნიშნული დასკვნა შესრულებული უნდა იყოს საუკეთესო საერთაშორისო აუდიტორული კომპანიების პირველ ათეულში მყოფი (Deloitte; PWC; E&Y; KPMG; BDO; RSM; Grant Thornton; Baker Tilly International; Growe Horvath International; Nexia.) ერთ-ერთი კომპანიის მიერ“, - აცხადებს რეგიონული განვითარებისა და ინფრასტრუქტურის სამინისტრო.

უწყებაში აღნიშნავენ, რომ  მოთხოვნა წესდება ქართული სამშენებლო კომპანიების კონკურენტუნარიანობის გაზრდის და მათი ფინანსური მართვის საერთაშორისო სტანდარტებთან დაახლოების  მიზნით.