თბილისი (GBC) - ასეთი მაღალი საბანკო პროცენტებით შეუძლებელია  საწარმოების ფეხზე დაყენება- ბიზნესმენი ცეზარ ჩოჩელი ძვირ ფინანსურ რესურსზე ჩივის.

მიიჩნევს, რომ ძვირადღირებული ფინანსური რესურსი აფერხებს ბიზნესს და არაერთი პროექტის განხორციელებას.

 „შეჩერებულია კერამიკის წარმოების, ასევე კონცენტრანტებისა და ეთერზეთების წარმოების პროექტები. ვეძებთ ინვესტორს. იგივე პრობლემაა, ძალიან მაღალია საბანკო პროცენტები, რომელსაც წარმოება ვერ გაუძლებს.  საწყის ეტაპზევე ასეთი  ტვირთი რომ დააწვეს, შეუძლებელი იქნება ამ საწარმოების ფეხზე დაყენება“, - განაცხადა ცეზარ ჩოჩელმა „ბიზნესკონტაქტში“ სტუმრობისას.

ამბობს, რომ პროექტების დასაწყებად ელის შესაფერის დროს და ასევე ინვესტორს, რომელიც ფულის ჩადებით დაინტერესდება.

მანამდე კი, ჩოჩელი სენაკში ცემენტის ქარხნის პროექტის განახლებას და ხილის ჩამბარებელი პუნქტის  გახსნას აანონსებს.

ამბობს, რომ ცემენტის ქარხნის პროექტი შეიცვალა,  4 პარტნიორიდან ერთ-ერთმა პირობები ვერ დააკმაყოფილა და მის ნაცვლად ახალი პარტნიორი შევა საწარმოში.