თბილისი (GBC) - „ფრანგული კომპანიების შეფასებით, საქართველო არის ერთ-ერთი საუკეთესო ადგილი, სადაც შეიძლება  რომ ბიზნესი გააკეთოს ადამიანმა და ეს ძალიან კარგი მესიჯია“- განაცხადა ეკონომიკის მინისტრის მოადგილემ MEDEF International-ის დელეგაციასთან შეხვედრის შემდეგ.

აღნიშნა, რომ შეხვედრაზე არაერთი თემა განიხილეს, მათ შორის სატრანსპორტო ინფრასტრუქტურისა და რკინიგზის კუთხით. 

„ჩვენთვის ძალაინ მნიშვნელოვანია ფრანგული მრავალწლიანი გამოცდილების მიღება და გაზიარება. ვიმედოვნებ, რომ მათი ვიზიტი იქნება ძალიან შედეგიანი“ -ამბობს გიორგი ჩერქეზიშვილი.

ფრანგული ბიზნესასოციაცია თბილისში შეხვედრებს უკვე 2 დღეა მართავს. ეკონომიკის სამინისტროში მათ საინვესტიციო გარემო და ეკონომიკური რეფორმები გააცნეს.

საფრანგეთში საქართველოს ელჩის, ეკატერინე სირაძე-დელონეს განცხადებით, საქართველოში იმყოფებიან საკმაოდ დიდი და ძლიერი   კომპანიები საფრანგეთიდან, რომლებსაც  სურთ, შეისწავლონ საქართველოში საინვესტიციო გარემო და ის მიმართულებები, სადაც შეეძლებათ ინვესტიციის ჩადება.

 MEDEF International-ის დელეგაციაში არიან ისეთი მსხვილი ფრანგული კორპორაციები, როგორებიცაა „ეარბასი“, „ალსტრომი“, „სოსიეტე ჟენერალი“, „პომა“, „ობერტიური“, „ივეკო ბასი“, „ბიურო ვერიტასი“ და სხვა.