თბილისი (GBC) - „ ლარიზაცია, ეს არის კომპლექსური გეგმა და გრძელვადიანი პროცესი. სახელმწიფო მას მუდმივად დაუჭერს მხარს“, -განაცხადა საფინანსო-საბიუჯეტო კომიტეტის თამჯდომარე ირაკლი კოვზანაძემ  გალარების პროგრამის დასრულების შემდეგ, აღნიშნა, რომ  ამ მიმართულებით პოსტსაბჭოთა ქვეყნებმა წლების წინ მიიღეს გადაწყვეტილება და იგი პოზიტიურად არის შეფასებული საერთაშორისო საფინანსო ინსტიტუტების მიერ.

გალარების პროგრამა, რომელიც მოქალაქეების მიერ დოლარში აღებული საბანკო სესხების ლარში გადატანას გულისხმობდა საფინანსო-საბიუჯეტო კომიტეტის თავმჯდომარემ  პოზიტიურად შეაფასა.

“რაც შეეხება გალარებას, ეს იყო სოციალური პასუხისმგებლობის მქონე სახელმწიფოს მხრიდან შეთავაზება მოსახლეობისთვის, რათა მათი განკარგვადი შემოსავლების შემცირების რისკი დაებალანსებინათ. თუ ავიღებთ ქართულ ბანკებს,   დოლარიზაციის  კოეფიციენტი თითქმის 80 პროცენტია. აქედან გამომდინარე, არის მაღალი რისკი. ამ თვალსაზრისით ჩვენ ჩავდეთ ბიუჯეტში 65 მილიონი ლარი და შევთავაზეთ მოსახელობას, ეს რისკი შეემცირებინათ. მოსახლეობის გარკვეულმა ნაწილმა - 5 ათასზე მეტმა მომხმარებელმა, ისარგებლა ამ შესაძლებლობით და 70 მილიონ დოლარზე მეტი გალარდა. ეს არის კარგი მაჩვენებელი. თებერვლის მეორე ნახევარში დიდი აქტივობა იყო. ვფიქრობ, ყველამ, ვინც ისარგებლა გალარების პროგრამით,  პოზიტიური ნაბიჯი გადადგა საკუთარი ოჯახის ბიუჯეტის სასარგებლოდ,“ - აღნიშნა საპარლამენტო უმრავლესობის შეკრებაზე ირაკლი კოვზანაძემ.