თბილისი (GBC) - საქართველოს ბაზრით სასტუმროს მსხვილი ოპერატორები ინტერესდებიან.

ბაზრის მიმზიდველობასა და პოტენციურ პროექტებზე შეხვედრები კანში, უძრავი ქონების საერთაშორისო გამოფენის, MIPIM-ის ფარგლებში Colliers International Georgia-მ გამართა.

კომპანიის  მმართველმა დირექტორმა, ირაკლი კილაურიძემ „საქმიან დილაში“ სტუმრობისას განაცხადა, რომ შეხვედრები სასტუმროების ოპერატორ მსხვილ კომპანიებთან შედგა, მათი ნაწილი საქართველოში უკვე წარმოდგენილია და პროექტებს ანვითარებს, თუმცა არიან სხვა კომპანიები, რომლებიც ჯერ არ შემოსულან, მაგრამ იციან, რომ საქართველო მიმზიდველი ბაზარია და საკმაოდ დიდი პოტენციალი აქვს, რადგანაც ტურისტების და ვიზიტორების რაოდენობა ქვეყანაში მზრდია. 

„საოპერაციო ნაწილშიც რომ შევხედოთ,  საერთაშორისო სასტუმრო კომპანიებს,  მათი მომგებიანობის მარჟა საქართველოში უფრო მაღალია, ვიდრე ცენტრალურ ან დასავლეთ ევროპაში“, - აცხადებს კილაურიძე და აქვე მიმდინარე სასტუმრო პროექტებზეც აღნიშნავს, რამაც შესაძლოა ჭარბი მიწოდება შექმნას ბაზარზე, მაგრამ მეორეს მხრივ, მოთხოვნაც ადეკვატურად იზრდება.

 „დღეს, რომ შეხედოთ ბაზარს და ნახოთ ფასები, აშკარაა რომ მიწოდება აკლია ბაზარს, რადგანაც ძალიან მაღალია ფასები და ძალიან კარგი ფინანსური მაჩვენებლები აქვთ (სასტუმროებს), ეს რასაკვირველია შეიძლება შეიცვალოს, ცოტა ქვემოთ ჩამოვიდეს, დარეგულირდეს,  მაგრამ ბევრია  დამოკიდებული იმაზე, როგორ განვითარდება მოთხოვნის ნაწილი, როგორი იქნება ტურიტების და ბიზნეს  ვიზიტების ნაკადი", - აღნიშნავს კილაურიძე.