თბილისი (GBC) - აჭარის ტურიზმის დეპარტამენტმა რეგიონის ტურისტული პოტენციალი მსოფლიოში ყველაზე მასშტაბურ ტურისტულ გამოფენაზე ITB Berlin 2017-ზე წარადგინა.

ბერლინში გამართულ გამოფენაზე  ვიზიტორებს რეგიონის ტურისტული შესაძლებლობები წარუდგინეს და დეტალური ინფორმაცია მიაწოდეს რეგიონში პოპულარული ტურისტული პროდუქტების შესახებ.

გამოფენის ფარგლებში აჭარის ტურიზმის დეპარტამენტის წარმომადგენლები გერმანული სარეკლამო კომპანიების წარმომადგენლებს შეხვდნენ და ურთიერთანამშრომლობის საკითხები განიხილეს. 

დეპარტამენტი  რეგიონის ტურისტული პროდუქტების პოპულარიზაციას წელს პირველად გერმანიაშიც იწყებს. სარეკლამო კომპანიებთან შეხვედრებისას სწორედ,  აჭარის პოპულარიზაციის მიზნით დაგეგმილი სარეკლამო და პიარ აქტივობები განიხილეს.

გერმანიაში სარეკლამო აქტივობების დაწყებას განსაკუთრებით უწყობს ხელს ქუთაისის საერთაშორისო აეროპორტში გერმანიის მიმართულებით არსებული ფრენები. ამ ეტაპზე, ქუთაისიდან ფრენები გერმანიის სამი ქალაქის -  ბერლინის, დორტმუნდისა და მემინგემის მიმართულებით ხორციელდება.

დეპარტამენტი რეგიონის რეკლამირებას გერმანიის ტურისტულ ბაზარზე გაზაფხულის მეორე ნახევრიდან დაიწყებს.

აღსანიშნავია, რომ ბერლინის საერთაშორისო ტურისტული გამოფენა ყოველწლიურად 170 ათასამდე დამთვალიერებელს ითვლის. გამოფენაზე საკუთარ პროდუქციას 180 ქვენის 11 ათასამდე ორგანიზაცია წარადგენს. ტურიზმის სფეროში იგი ერთ-ერთი ყველაზე მასშტაბურია მსოფლიოში.