თბილისი (GBC) - პროგრამის „აწარმოე საქართველოში“ ფარგლებში მხარდაჭერილ 228 საწარმოს კიდევ ერთი,  ასფალტ-ბეტონის გადამამუშავებელი საწარმო  „ჯეუ გრუპი“ შეემატება.

საუბარია  მობილურ ასფალტ-ბეტონის ქარხანაზე, სადაც 24 ადამიანი დასაქმდება. ინვესტიციის ჯამური მოცულობა  3,35 მლნ ლარია.

 "ჯეუ გრუპის“ ინფორმაციით, კომპანიამ  ბოლო ორი წლის განმავლობაში  სწრაფი ტემპით განვითარება შეძლო და მნიშვნელოვანი ადგილი დაიმკვიდრა  საგზაო მშენებლობის ინდუსტრიაში.

ეკონომიკის სამინისტროს მეწარმეობის განვითარების სააგენტოს მხარდაჭერით, კომპანიამ შეიძინა მობილური ასფალტ-ბეტონის ქარხანა, რომელიც ორიენტირებულია უმაღლესი ხარისხის ასფალტის წარმოებაზე. ქარხანა შეძლებს მოამარაგოს საქართველოს ნებისმიერი წერტილი, რადგან ქარხანა არის მობილური და მის დისლოკაციას სჭირდება მხოლოდ ერთკვირიანი დემონტაჟისა და მონტაჟის სამუშაოები.

ამასთანავე, ქარხნის სპეციფიკიდან გამომდინარე, საჭირო ნედლეულის მოსამარაგებლად შესაძლებელი იქნება კონკრეტული ადგილმდებარეობის პროექტებზე ადგილობრივი ინერტული მასალების კარიერების ამუშავებაც. 

„ჯეუ გრუპის“ საწარმო, რომელიც 2017 წლის მაისის თვეში გაიხსნება,  ქ. თბილისში, თვალჭრელიძის II ჩიხში მდებარეობს და პროგრამის „აწარმოე საქართველოში“ ფარგლებში ფინანსური მხარდაჭერით სარგებლობს.