თბილისი (GBC)-  უძრავ ქონების შესახებ ინფორმაციის ბლოკჩეინში ასახვა ამონაწერის განახლების შემდეგ მოხდება, - საჯარო რეესტრის სააგენტოს ცნობით ბლოკჩეინში უკვე ასახულია 20 თებერვლიდან, უძრავ ქონებაზე გაკეთებული ყველა ამონაწერი.

უწყების ცნობით, ონლაინსერვისებით მოქალაქეები სულ უფრო ხშირად სარგებლობენ.   ყველაზე პოპულარული ონლაინ სერვისი  უძრავ ქონებაზე ამონაწერის  მომზადებაა.  დღემდე  ამ სერვისით 190 ათასამდე მოქალაქემ ისარგებლა.   

„ბლოკჩეინის გლობალურ ქსელში კი, მონაცემების  წაშლა,  შეცვლა,  გადაწერა თუ უკანონო მანიპულირება შეუძლებელია. შესაბამისად, უძრავი ქონების შესახებ ინფორმაცია კიდევ უფრო მეტად დაცული,  მსოფლიო მასშტაბით ხელმისაწვდომი  და გამჭვირვალეა”, - აცხადებენ სააგენტოში, აღნიშნავენ, რომ   მოქალაქეებს ამონაწერის განახლება ტერიტორიული ოფისების, იუსტიციის სახლების და საზ. ცენტრების გარდა, ელექტრონულადაც   შეუძლიათ.

აღსანიშნავია, რომ ამონაწერის ელექტრონულად განახლება 15 ლარის ნაცვლად 10 ლარი ღირს, დაჩქარებული წესით, იმავე დღეს მიღება კი 50 ლარის ნაცვლად, 40 ლარი.

საჯარო რეესტრი მოქალაქეებს ელექტრონულად უძრავი ქონების რეესტრის ყველა სერვისით სარგებლობის საშუალებას აძლევს.  დაინტერესებულ პირს, სახლიდან თუ ოფისიდან გაუსვლელად, საჯარო რეესტრის ოფიციალური ვებგვერდის www.napr.gov.ge-ს დახმარებით შეუძლია ინტერნეტით მოითხოვოს და ინტერნეტითვე მიიღოს ნებისმიერი ინფორმაცია.