თბილისი (GBC) - ვინ გამართავს CHECK IN GEORGIA-ს ფარგლებში კულტურულ ღონისძიებებს ინტერესთა გამოხატვით გამოვლინდება. 

სწორედ გამოცხადებული ინტერესთა გამოხატვის საშუალებით შეირჩევა კულტურული ღონისძიებები, რომლებიც  ივნისი-სექტემბრის განმავლობაში „ბლექ სი არენაზე“ გაიმართება.

დღეიდან ათი კალენდარული დღის განმავლობაში  დაინტერესებულ მხარეს  შეეძლება წარმოადგინოს  წინადადებები, თუ რომელი ან რამდენი მუსიკალური, ქორეოგრაფიული თუ სხვა სახის კულტურული ღონისძიების ორგანიზება შეუძლია.

კონკურსში მონაწილე სუბიექტების განაცხადებს განიხილავს სპეციალური კომისია, რომელიც დაკომპლექტებული იქნება დარგში მოღვაწე მაღალი კვალიფიკაციის მქონე სპეციალისტებით, რომლებსაც შესაბამისი ცოდნა, რეპუტაცია და გამოცდილება აქვთ.

დაინტერესებულ მხარეებს დეტალური ინფორმაციის მიღება შეეძლებათ  „ბლექ სი არენას“ ოფიციალურ ვებ-გვერდზე  www.bsa.com.ge და სახელმწიფო შესყიდვების სააგენტოს ვებ-გვერდზე: http://procurement.gov.ge/.