თბილისი (GBC) - ახალგაზრდა ქართველი დიზაინერი, მარიამ გვასალია საკუთარ კოლექციას იტალიაში გასაგზავნად ამზადებს.

ევროპული ბაზრისთვის სამოსი ქართულ ფაბრიკაში "ჯეო-ემ-ტექსში" შეიკერება. 

მეწარმეობის განვითარების სააგენტოს ცნობით, შეთავაზება მარიამ გვასალიამ თბილისის მოდის კვირეულზე 2016 წლის შემოდგომაზე მიიღო, კოლექცია "გაზაფხული-ზაფხული 2017" ვენეციურმა მაღაზიამ მოითხოვა. 

სრული კოლექცია მაღაზია ალდუკადაოსტაში თებერვლის ბოლოდან გაიყიდება. 

ქართული საფეიქრო ნაწარმით მოდის ინდუსტრიის საერთაშორისო წარმომადგენელების დაინტერესება სახელმწიფო პროგრამაში „აწარმოე საქართველოში“ ჩართულ კომპანიაში „ჯეო-ემ-ტექსში“ გამართული ჩვენების შედეგად მოხდა.

საწარმო, სახელმწიფო პროგრამის ფარგლებში ფინანსური და ინფრასტრუქტურული მხარდაჭერით სარგებლობს და საფეიქრო ინდუსტრიაში მოღვაწე კომპანიაა, რომელიც ხარისხიანი პროდუქციის წარმოებისათვის ყველა სათანადო რესურსს ფლობს და როგორც ქალის, ასევე მამაკაცის ტანსაცმლის  საწარმოო ხაზს აერთიანებს.

კომპანიას, თანამედროვე სტანდარტების საწარმოში, უკვე შეძენილი აქვს მაღალი ხარისხის საკერავი და საქსოვი მანქანები და თანამშრომლობს წამყვან ევროპულ კომპანიებთან, მათ შორის „მონკლერთან“.