თბილისი (GBC) – სოფლის მეურნეობის სამინისტრომ 2016 წელს, აგროსასურსათო პროდუქციის ექსპორტის ზრდაზე განაცხადა.

სამინისტროს ცნობით, გასულ წელს 692.2 მლნ აშშ დოლარის აგროსასურსათო პროდუქციის ექსპორტი განახორციელა, ზრდა 13%-ია.  აღსანიშნავია ისიც, რომ საანგარიშო პერიოდში, 2015 წელთან შედარებით, აგროსასურსათო პროდუქციის იმპორტში 4%-იანი კლება აღინიშნა, ხოლო უარყოფითი სალდო აგროსასურსათო სექტორში 25%-ით შემცირდა.

"ჩვენ ვზრდით წარმოებას აგრარულ სექტორში, ხელს ვუწყობთ წარმოების ერთიანი ჯაჭვის განვითარებას, პირველადი წარმოების პროდუქციისათვის დამატებული ღირებულების შექმნას. ეტაპობრივად, ადგილობრივ ბაზარს სულ უფრო მეტი ქართული პროდუქტი მიეწოდება და ექსპორტის მაჩვენებლები იზრდება“, - აცხადებს სოფლის მეურნეობის მინისტრი.

 2016 წელს ძირითადი საექსპორტო აგროსასურსათო პროდუქტები იყო: თხილი, ყურძნის ნატურალური ღვინოები, სპირტიანი სასმელები, მინერალური და მტკნარი წყალი, ცოცხალი მსხვილფეხა რქოსანი პირუტყვი. 

სპირტიანი სასმელების ექსპორტმა, 91.8 მლნ აშ შდოლარი შეადგინა, რაც 41.5%-ით აღემატება 2015 წლის მაჩვენებელს;

 ღვინის ექსპორტმა 113.5 მლნ აშშ დოლარი შეადგინა, რაც 18.5%-ით აღემატება 2015 წლის მაჩვენებელს;

ცოცხალი მსხვილფეხა რქოსანი პირუტყვის ექსპორტმა 36.8 მლნ აშშ დოლარი შეადგინა, რაც 83.3%-ით აღემატება 2015 წლის მაჩვენებელს;

თევზის ფქვილის ექსპორტმა 15.2 მლნ აშშ დოლარი შეადგინა, რაც 41.8%-ით აღემატება 2015 წლის მაჩვენებელს;

 ბოსტნეულის ექსპორტმა 8 მლნ აშშ დოლარი შეადგინა, რაც 21.8%-ით აღემატება 2015 წლის მაჩვენებელს.

რაც შეეხება საექსპორტო ბაზრებს. ექსპორტი 88  ქვეყანაში განხორციელდა, მათ შორის, 12.1 მლნ აშშ დოლარით (5.8%) გაიზარდა ევროკავშირის ქვეყნებში ექსპორტირებული აგროსასურსათო პროდუქციის ღირებულება.