თბილისი (GBC) - სამტრედია-გრიგოლეთის 12 კმ-იანი გზის მშენებლობისთვის ფინანსური წინადადებები გაიხსნა.

ტექნიკური წინადადება სულ 14-მა კომპანიამ წარმოადგინა, საიდანაც 5 კომპანია შეირჩა და მათ მიერ შემოთავაზებული ფინანსური წინადადებების შეფასება მოხდება, საუკეთესო შეთავაზების მქონე კომპანია კი, მე-3 მონაკვეთის მშენებლობას დაიწყებს.

სამტრედია–გრიგოლეთის გზის 12 კმ-იანი მონაკვეთის (მე-3 მონაკვეთი)  მშენებლობას ევროპის საინვესტიციო ბანკი და ევროკავშირი აფინანსებენ.

მშენებლობის პროექტი, 4 ზოლიანი ასფალტ–ბეტონის გზის, 6 სახიდე გადასასვლელის, 2 სატრანსპორტო კვანძის და  მიწისქვეშა გასასვლელების მშენებლობას ითვალისიწინებს. აღნიშნული მონაკვეთი გურიის რეგიონში - ქ. ლანჩხუთსა და ლანჩხუთის მუნიციპალიტეტის სოფლებს გაივლის.

სამტრედია-გრიგოლეთის გზა (სულ 52 კმ-იანი მონაკვეთისაგან შედგება) ზესტაფონი-ქუთაისის შემოვლითი-სამტრედიის გზის 42-ე კმ-ზე, მდ. ოჩოფასთან იწყება და  გრიგოლეთის ტერიტორიაზე,  მდინარე სუფსასთან მთავრდება. 

ამ გზის ჩქაროსნულ მაგისტრალად მოდერნიზების პროექტი 4 მონაკვეთად ხორციელდება. პირველ, მეორე და მეოთხე მონაკვეთზე სამუშაოები უკვე მიმდინარეობს.