თბილისი (GBC) – Fitch Ratings-ი საქართველოში მონეტარული პოლიტიკის გამკაცრებას, არსებული ვითარების გათვალისწინებით, დადებითად აფასებს, თუმცა ეკონომიკის ზრდაზე წნეხის ალბათობას ხედავს.

გავლენიანი სააგენტო აღნიშნავს, რომ სებ-ის მიერ რეფინანსირების განაკვეთის ზრდა აჩვენებს მთავრობის მზადყოფნას მოახდინოს ლარის გაუფასურების რისკების შემცირება და  ეროვნული ვალუტის ნდობის გამყარება. 

Fitch – ი აღნიშნავს, რომ ეროვნულმა ბანკმა რეფინანსირების განაკვეთი გასულ კვირას 25 საბაზისო პუქტით 6.75%-მდე გაზარდა და ინფლაციის ზრდის რისკზე მიანიშნა, რაც ლარის გაუფასურებით და აქციზის გაზრდით არის განპირობებული. მთავარი ბანკი 2017 წელს ინფლაციას 4%-ზე მაღლა ელის და  სწორედ ამის გათვალისწინებით, მომდევნო ორი კვარტლის განმავლობაში მთავარი განაკვეთის 7% გაზრდას გეგმავს.  

სარეიტინგო კომპანია აღნიშნავს, რომ ლარის კურსზე მნიშვნელოვანი გავლენა მოახდინა თურქული ლირის გაუფასურებამ, რომელიც უმსხვილესი სავაჭრო პარტნიორია.

„ჩვენ ვფიქრობთ, რომ სებ-ის მზადყოფნა გაამკაცროს მონეტარული პოლიტიკა სუსტი მოთხოვნისა და ფასებზე ზრდის ფონზე (წლიურმა ინფლაციამ 2016 წლის დეკემბერში 1.8% შეადგინა), აჩვენებს, რომ ესაა ერთგვარი პრევენცია შესაძლო რისკებისგან, რომელიც შესაძლოა ვალუტის გაუფასურებამ გამოიწვიოს. ესენია მთავრობის ვალის სენსიტიურობა გაცვლით კურსთან მიმართებაში, დიდი მოცულობით საგარეო ვალი და მაღალი დოლარიზაციის მაჩვენებელი საბანკო სექტორში“, - აღნიშნავს სააგენტო და წერს, რომ სებ-მა  დოლარიზაციის შესამცირებლად ადგილობრივ ვალუტაში სესხების ნებაყოფლობითი კონვერტაციის სქემა შემოიღო.

Fitch-ის განცხადებით, გამკაცრებულმა მონეტარულმა პოლიტიკამ შესაძლოა გავლენა მოახდინოს მიმდინარე წლის ეკონომიკურ ზრდაზე. მათი პროგნოზით, ეკონომიკური ზრდა  წელს 4.2% იქნება. ეს მაჩვენებლი კი ასახავს გაზრდილ მოთხოვნას რუსეთიდან და ინფრასტრუქტურული პროექტების როლს.

Fitch-ი  საქართველოს სუვერენულ რეიტინგს ბოლო, სექტემბრის მონაცემებით "BB-" დონით აფასებს, პროგნოზით "სტაბილური".

შემდგომ  მიმოხილვას სარეიტინგო სააგენტო 24 მარტს გამოაქვეყნებს.